نەسرەوتن تا سەرکەوتن دروشمی شۆڕشی کوردستانە
پەیامی ڕێکخراوی لاوانی خەبات، بەبۆنەی سێهەمین ساڵوەگەڕی شۆڕشی ژینا
هاونیشتمانیانی تێکۆشەر! لاوانی پێشەنگ و بەهەڵوێست! سێ ساڵ پێش ئێستاو لە ۲۵ی خەرمانی ۱۴۰۱، کچە کوردی بێتاوان و مەزڵوم، ژینا ئەمینی، بە یاسای دژە ژنی حکومەتی ئێران، بەبیانوی ڕەچاو نەکردنی یاسا داسەپاوەکانی حیجاب، لەلایەن بەکرێگیراوانی حکومەت، لەشاری تاران شەهید کرا. شەهید کرانی ژینا ئەمینی، بوە هۆی توڕەیی و ناڕەزایەتی خەڵکی وەزاڵەهاتوو لە ئاخوندە دێوەزمەکان. ناوی ژینا بوە ڕەمزی شۆڕشێک کە پێشەنگایەتی ئەو شۆڕشە لەدەستی لاوان و ئافرەتانی ئازاو چاونەترس بانگەوازی ڕووخانی دەسەڵاتی خوێنڕێژی بەرزکردەوە کە تا ئێستاش بەردەوامە. شۆڕشی ژینا، چەندین تێڕوانین و خاڵی سەرەکی و شیاوی بوو کە ئاماژە بە چەند دانەیەکی دەکەین;
۱. شۆڕشی ژینا بەباشی توانی ڕووناکبیری و زانستی توێژی لاوان و هێز و توانایانیان بۆ هەر جۆرە ئاڵووگۆڕێک لە وڵاتدا دەربخات
۲. لە شۆڕشی ژینادا، بوێری و پێشەنگی ئافرەتان و تواناییان بۆ ڕێبەری شۆڕش، وێڕای چەندین ساڵ چەوسانەوه بەدەستی حکومەتەکانی پەهلەوی و ئاخوندی لە ئێران سەلمێندرا
۳. دەنگی ئازادیخوازی خەڵکی مەزڵومی ئێران و کوردستان زورتر بە جیهان گەیشت
۴. دروشمی شۆڕشی ژینا؛ ژن، ژیان، ئازادی، بوو بە دروشمێکی جیهانی و سەمبولی مافویستی و ڕزگاریخوازی
۵. شۆڕشی ژینا توانی زۆربەی خەڵکی ئازادیخوازی ئێران لە دەوری یەک کۆ بکاتەوە، هەروەها ئەوەی سەلماند کە سیاسەتی تەفرەقەو هەوڵی ڕژیم بۆ ئاڵۆزی سازکردن لەنێوان بیر و بۆچوونە جیاوازەکان لە ئێران و کوردستان توشی شکست بکات
۶. ئەو شۆڕشە سەلماندی کە ئەگەر خەڵکی ئازادیخواز هاوهەڵوێست و یەکگرتوو بن، هێزی ڕژیمی ئێران ناتوانێت ڕێگری لە ڕووخان و لەناوچوونی دەسەڵات بکات و ویستی خەڵک لە هەر هێزێکیتر بەتواناترە. ئەزمونی شۆڕشی گەلان لەساڵی ۱۳۵۷ دەتوانێ نمونەیەک بێ بۆ ئاگاداری و وریایی خەڵکی ئازادیخواز کە نەهێڵن جێگەی دیکتاتۆرێک بە دیکتاتۆرێکی دیکە پڕ بێتەوە.
لاوانی ئازاو چاونەترس!
کچان و کوڕانی ئازادیخواز!
ئەمساڵ و لە یادی سێ ساڵەی شەهیدکرانی ژینا ئەمینیدا سەرەڕای تەبلیغات و هەوڵەکانی حکومەتی ئێران بۆ سەرکوتی شۆڕشی ژینا، ئەو بزوتنەوەیەو ئەو شۆڕشە بەردەوامەو ڕیشەی بزاڤی ئازادیخوازی لە ئێران و کوردستان قەد بنبڕ ناکرێت و لە دڵ و گیانی خەڵکدا چەکەرەی کردوە کە بەهیچ هێزێک کۆتایی پێی نایەت و تا گەیشتن بە ئامانج بەردەوام دەبێ.
ئەمساڵ جارێکی دیکەو پاش شەڕی ۱۲ ڕۆژەی حکومەتی ئێران و ئیسرائیل، باشتر سەلمێندرا کە ئەو دەسەڵاتە چەندە لاوازەو تەنیا هێزی خۆی بۆ سەرکوتی خەڵکی بێتاوان بە هێرش کردنە سەر ئافرەتان لە شەقامەکان بە بیانوی حیجاب، کوشتنی نامرۆڤانەی کۆڵبەران، سەپاندنی سزای دژە ئینسانی ئیعدام و لەسێدارەدانی لاوانی ناڕازی بەکار دەگرێت و بۆ کوشتار و جنایەت دژ بە هاووڵاتیان و خەڵکی ئازادیخواز و جیابیران هیچ دەستپارێزیەک ناکات. هەروەها وەک هەمیشە سەلماندویەتی کە هیچ جۆرە ڕێفۆرمێک و چاکسازیەک لەخۆیدا ناکات و هیچ جۆرە پاشەکشیەک لە سیاسەتەکانی ناکات و لە هەوڵی خۆ ڕێکخستنەوەیە بۆ زیاتر پەیڕەو کردنی سیاسەتە چەوت و دژە خەڵکیەکان. ئێستاش پاش شەڕی ۱۲ ڕۆژەو چالاک کرانی میکانیزمی ماشە، بە ڕەواڵەت لە هەوڵی ئەوەدایە کە لەژێر ناوی دانوستاندا درێژە بە چالاکیە ئاژاوەگێڕانەکانی بدات.
لەوەها هەلوومەرجێکدا، پێوستە بەکەڵک وەرگرتن لە دۆخی ئێستا و لاواز بوونی هەرچی زۆرتری حکومەتی ئێران، هەروەها دۆخی سیاسی، ئابوری و کۆمەڵایەتی خەڵکی ئێران و کوردستانی بەرەو ئاقارێکی لەناوچوون بردوەو ڕۆژ لەدوای ڕۆژ بەهۆی ئەو هەلوومەرجە، خەڵک فشاری زۆرتری لەسەر دەبێت و خەساری قەرەبوو نەکراوی تووش دەبێ، کاتی ئەوە هاتووە کە ئاگری شۆڕش بڵێسە بکێشێتەوە. بۆیە پێویستە لەو دۆخەدا کە خانەوادەی شەهید ژینا ڕایانگەیاندوە کە سێهەم ساڵیادی ڕۆڵەکەیان دەگرن، خەڵکی ئازادیخواز و مافویست لەو ڕۆژەدا سەردانی ماڵی شەهید ژیناو خانەوادەی شەهیدان بکەن و بەو جۆرە هاودڵی، یەکیەتی و یەکگرتووی خۆیان نیشان بدەن و بیسەلمێنن کە هیچ هێزێک نە توانیویەتی و نە دەتوانێ ڕێگری لە ئازادیخوازی و مافویستی خەڵکی تێکۆشەر بۆ گەیشتن بە ڕزگاری و ئازادی لەدەستی حکومەتە دیکتاتۆر و دژە خەڵکیەکان بکات. دڵنیاین کە بە ورەو توانای ئێوەی تێکۆشەر و خەباتی بێ وچانتان، کاخی زۆرداری ڕژیمی ئێران دەڕوخێت و گەلی کورد و گەلانی دیکەی ئێران لەژێر چەتر و سێبەری دیمۆکراسیدا دەحوێنەوە.
بەرز و بەڕێز بێ ساڵیادی شەهید کرانی شەهید ژینا، هێمای شۆڕشی ژن، ژیان، ئازادی
بڕۆخێ حکومەتی دیکتاتۆری ئاخوندی
سەرکەوێ خەباتی ڕەوای ئازادیخوازی
ڕێکخراوی لاوانی خەباتی کوردستانی ئێران
دەستەی بەڕێوەبەری
٢٣ی خەرمانان ١٤٠٤
