كۆبوونەوەی رێکخراوی لاوانی خەباتی كوردستانی ئێران لە وەڵاتی نەروێژ

رۆژی شەممە 28ی دیسەمبەری 2019 كومیتەی نەروێژی رێکخراوی لاوانی خەباتی کوردستانی ئێران كۆبوونەوەیەكی گشتی بەرێوەبرد.
كۆبوونەوەكە سەرەتا بە دەقیقەیەك وەستان بۆ رێز گرتن لە رۆحی پاكی شەهیدانی كورد و كوردستان لەلایەن كاك سارۆ حوسەینی ئەندامی دەستەی بەرێوەبەری رێكخراوی لاوان دەستی پێ كرد.
كاك سارۆ سەرەتا ئیشارەی بە چلەی شەهیدانی راپەرینی مانگی خەزەڵوەر لە شارەكانی ئێران و كوردستان كرد و بەرێزەوە یادی لەو شەهیدانەی كردەوە و هیوای چاكبوونەوە بۆ برینداران و ئازادی بە پەلەی بۆ گیراوانی ئەو راپەرینە خواست. ناوبراو هەروەها باسێكی لە باروودۆخی هەنووکەیی کوردستان بەگشتی و لاوانی خوێن گەرمی ناوخۆی ووڵات بەتایبەتی کرد.
جێگەی باسە لە کۆبوونەوەکەدا کاک عەبدوڵڵای قادری بەرپرسی كومیتەی نەروێژی سازمان ئامادەبوو وە باسێكی بەپێزی لەبارەی ئەرک و پێویستی چالاک بوونی لاوان بەتایبەت کۆمیتەی نەروێژ کرد و هانی لاوانی ریزەكانی كومیتەی نەروێژی سازمانی دا زیاتر لە رابردوو لە كاروچالاكیەكاندا دەور بگێڕن و رێگەی شەهیدانی سازمانی خەبات و مامۆستا سەید جەلالی نەمر ون نەكەن.
کاک عەبدوڵڵای قادری لە درێژەی باسەكەیدا یەکڕیزی و هاوڕێیەتی نێوان ئەندامانی رێکخراوی لاوانی بەپێویستیەكی حەتمی بۆ پێشخستنی كار و ئەركە سازمانی نەتەوەییەكان زانی.
دواتر كاك سارۆ حوسەینی جەختی لە گرنگی بیری سەردەمیانەی لاوان کردەوەو بەپێویستی زانی کە لاوانی ریزەکانی ڕێکخراو سوود لە ئاست و توانای لاوان لە بارە جیاوازەکانی خوێندنیان ببین و بە ئایدیا و بیروبۆچوونی سەردەمیانە رێکخراوی لاوان و ئامانجەکانی بەرەوپێش بەرن.
ناوبراو رۆڵی بوونی رێکخراوی لاوانی خەباتی كوردستانی ئێرانی لە پێناو خزمەت بە لاوانی ستەم لێکراوی کوردستان و لاوانی رێبازی پیرۆزی سازمانی خەبات بە گرینگ و پێویست پێناسە كرد و شێواز و میکانیزمەکانی کارکردنی ئەندامانی رێکخراو بەشێكی دیكەی قسەكانی كاك سارۆ بوو.
لە بەشێكی دیكەی کۆبوونەوەکە ئەندامانی رێكخراوی لاوان بە راو بۆچوونەکانیان کۆبوونەوەکەیان دەوڵەمەند کرد و بریار لەسەر چەند رێوشوێنێكی تایبەت بۆ گەرم داهێنانی لاوان و پەرەپێدانی تواناكانیان و بەربڵاوتركردنی چالاكیەكان درا.
ڕێکه‌و 2019-12-28 17:16:23
به‌شی ( چالاکیه‌کان )







سیاسی