٣٢ ساڵ خه‌باتی مافخوازانه‌ و ئاسۆیێكی پرشنگدار



ده‌به‌ست به‌شێوه‌یێك كه‌ سیسته‌مێكی چه‌ند به‌رابه‌ر دیكتاتۆریان هێنا ئاراوه‌ و هه‌ر نه‌دایه‌كی ئازادیخوازانه‌یان به‌خه‌یانه‌ت به‌ووڵات وئینقلاب ناوهێنا.

گه‌لی كوردكه‌تامه‌زرۆی ئازادی بوو، وهیواداربوو مافه‌كانی له‌ده‌ست چووی بۆ بگه‌رێته‌وه‌ به‌داخه‌وه‌ نه‌ك به‌مافه‌ له‌ده‌ست چووه‌كانی نه‌گه‌یشت به‌ڵكووكه‌وته‌به‌ر بێ ره‌حمانه‌ترین شێوه‌كانی سه‌ركوت وچه‌وساندنه‌وه‌، هه‌ربۆیه‌ به‌ناچاری رێگه‌ی خه‌بات وبه‌ربه‌ره‌كانی له‌به‌رانبه‌ر ئیستبدادی هه‌ڵبژاردو هاوكات له‌گه‌ڵ باقی ئازادیخوازانی ئێرانیدا له‌ به‌رامبه‌ر ئه‌و رژیمه‌دا وێستایه‌وه‌ و ئاماده‌ نه‌بوو كه‌ مل به‌ ده‌سه‌ڵاتێكی له‌و چه‌شنه‌ بدات كه‌له‌ژێرناوی وه‌ك دین و برایه‌تی موسڵمانان، هه‌موو ئازادیه‌كان ژێر پێ ده‌نێ و له‌ حاست داواكانی گه‌لی كوردا هێرشی بۆسه‌رماڵ وژیانی خه‌ڵكی كوردستان په‌یره‌وده‌كرد. 

له‌وه‌ها هه‌ل و مه‌رجێكدا كه‌ كوردستان پێی دا تێده‌په‌رِی، هێزێكی سیاسی له‌ نێو كۆمه‌ڵانی خه‌ڵكی كوردستانه‌وه‌ شكلی گرت و پێی نایه‌ مه‌یدانی سیاسی كوردستانه‌وه‌، كه‌ به‌ به‌رنامه‌ و رێباز و ئایدۆلۆژیا جیاواز بوو له‌ هێز و لایه‌نه‌ سیاسیه‌كانی دیكه‌ی كوردستان. هێزێك كه‌ مه‌سه‌له‌ی نه‌ته‌وه‌یی كوردی كردبووه‌ ئامانج و دینی وه‌ك فكر و ئایدۆلۆژی هه‌ڵبژارد. هێندێ جار ئه‌و پرسیاره‌ دێته‌ ئاراوه‌ كه‌ بۆ چی سازمانی خه‌بات، ئیسلامی وه‌ك ئایدۆلۆژی هه‌ڵبژاد و بۆ چه‌ندین ساڵ له‌ سه‌ر ئه‌و ئه‌ساسه‌ كاری كرد؟ له‌ جوابدا ووته‌یێكی مامۆستا سه‌یید جه‌لالی نه‌مر دێنمه‌ كه‌ ده‌یفه‌رموو، ئه‌گه‌ر هه‌موو حیزب و رێكخراوه‌كانی كوردستان خه‌باتی نه‌ته‌وه‌ییان بكردایه‌ و خۆیان به‌ دوور بگرتایه‌ له‌ ئایدۆلۆژیه‌ كمۆنیستی و سوسیالیستیه‌كان ئه‌وا پێویستی نه‌ده‌كرد سازمانی خه‌باتیش دین بكاته‌ فكر و ئایدۆلۆژی خۆی و ته‌نها خه‌باته‌ نه‌ته‌وه‌ییه‌كه‌ی ده‌كرد.

بێ شك له‌و قۆناغه‌دا تێكرِای هێز و لایه‌نه‌ كوردستانیه‌كان و بگره‌زوَربه‌ى ئێرانیه‌كانیش كه‌ له‌ كوردستاندا رێگه‌ی چالاكیان هه‌بوو، پێش ئه‌وه‌ی خه‌باتی ئازادیخوازی بكه‌ن،خه‌باتی ئیدۆلۆژیان ده‌كرد. به‌ شێوه‌یێك بوو كه‌ هه‌ر كه‌س باسی كورد و مه‌سه‌له‌ نه‌ته‌وه‌ییه‌كانی بكردایه‌ به‌ ورده‌ بورژوا و پیاوی ئیمپریالیزم له‌ قه‌له‌م ئه‌درا و ئه‌نواعی شایه‌عه‌ و قسه‌ی ژه‌هراویان بۆ ساز ئه‌كرد، به‌ كورتی پێیان وابوو ئینقلابی و شۆرشگێرِ ئه‌و هێزه‌یه‌ كه‌ چه‌پ بێ و چه‌پایه‌تی بكات. كه‌ به‌داخه‌وه‌ ئه‌و هه‌سته‌ ئه‌ونده‌ زاڵ بوو كه‌ بۆ چه‌ند ساڵی ره‌به‌ق شه‌رِی خۆكوژی و براكوژی لێكه‌وته‌وه‌ و تا ئێستاش ئاسه‌واری ماوه‌.

سازمانی خه‌بات كه‌ جیاوازیی هه‌بوو له‌گه‌ڵ لایه‌نه‌كانی دیكه‌، تووش كێشه‌ و ده‌ردی سه‌ریان كردو پیله‌ی جۆراوجۆری پێ گیرا و به‌ به‌رنامه‌ له‌ چه‌ند لاوه‌ هێرشی كرایه‌ سه‌ر و به‌ زۆر په‌لكێشی ئاگری شه‌رِ كرا. هه‌روه‌ها به‌ هه‌موو شێوه‌یێك كه‌وتنه‌ هێرش كردنه‌سه‌ر سازمان و زمانیان به‌ هه‌موو بارێكدا له‌ دژی ده‌سوورِا و هه‌وڵی زۆر درا بۆ له‌ مه‌یدان به‌ده‌ر كردنی.

مێژووی زیاتر له‌ سێ ده‌یه‌ی سازمانی خه‌بات ئه‌كرێ به‌م جۆره‌ پۆلین بكرێ.

یه‌كه‌م: ساڵی ١٣٥٨ كه‌ ده‌فته‌ری مامۆستا شێخ عزه‌دین دامه‌زرا، ئه‌ركی هه‌ره‌ گرینگ و قورسی ئه‌و ده‌فته‌ره‌ له‌ سه‌ر شانی مامۆستا شێخ جه‌لالی نه‌مر و هاوه‌ڵانی بوو، له‌و ساڵه‌دا هه‌ر له‌ سه‌ره‌تاوه‌ له‌ ناوچه‌ جیاجیاكانی كوردستان به‌تایبه‌ت له‌ باشووری كوردستانی ئێران، شه‌رِ دژ به‌ هێزه‌كانی رژیم ده‌ستی پێ كرد بوو و هه‌ست به‌ مه‌ترسی شه‌رِی گشتی و سه‌رتاسه‌ری ده‌كرا،مامۆستا سه‌ییدجه‌لال له‌گه‌ڵ ژماره‌یێك له‌ هاورێیانی سه‌ردانی جنوبی كوردستانی كرد و ده‌ستی كرد به‌ هاندانی جه‌ماوه‌ری ئه‌و ناوچانه‌ و نیاز و به‌رنامه‌كانی رژیمی نوێی بۆ خه‌ڵكی ئه‌و ناوچانه‌ روون كرده‌وه‌. له‌ شه‌رِی سه‌رتاسه‌ری رژیم دژ به‌ كورد كه‌ به‌ شه‌رِی سێ مانگه‌ ناسراوه‌ و له‌ ٢٨ی گه‌لاوێژی هه‌مان ساڵ و به‌ فتوای خومه‌ینی ده‌ستی پێ كرد، هێزی پێشمه‌رگه‌ی ده‌فته‌ر زۆر قاره‌مانانه‌ به‌ره‌نگاری ئه‌و هێزانه‌ بوونه‌وه‌ و چه‌ندین ده‌رسی خوَراگری و قاره‌مانه‌تیان تۆمار كرد، كه‌ ئه‌كرێ ئیشاره‌ به‌ شه‌رِی قه‌ره‌چیاوه‌ی سه‌قز كه‌ شه‌هید سه‌ید خه‌لیل و شه‌هیدسه‌یید عه‌بدولكه‌ریم فه‌رمانده‌یی هێزه‌كانی ده‌فته‌ریان ده‌كرد، ئێرانشای سه‌قز مامۆستا شێخ جه‌لالی هه‌رگیز نه‌مر و شه‌هید سه‌ید عه‌بدولكه‌ریم سه‌رپه‌ره‌ستی شه‌ره‌كه‌یان كرد، كامیاران شه‌هید كاك عه‌بدولكه‌ریم سه‌رپه‌رستی هێزه‌كانی ده‌فته‌ری كردوه‌، كه‌لی خان كه‌ له‌لایه‌ن هێزی به‌رگری ده‌فته‌ر و هێزی پێشمه‌رگه‌وه‌ ئه‌نجام دراو هێزه‌كانی رژیمیان تێك شكاند ژماره‌یه‌كی زۆر له‌ تانك و تۆپی هێزه‌كانی رژیم ده‌ستی به‌ سه‌ردا گیرا. هه‌روه‌ها شه‌رِی ده‌ی خه‌زه‌ڵوه‌ر كه‌ له‌ كه‌وپێچی ده‌شته‌تاڵی بانه‌ به‌ فه‌رمانده‌یی شه‌هید سه‌ید عه‌بدولكه‌ریم ده‌ستی پێ كردو له‌ ده‌روازه‌ی ئه‌و شاره‌ هێزه‌كانی رژیم له‌ ناوچوون، به‌ پێی ئاماره‌كانی رژیم كه‌ له‌ رۆژنامه‌ی ئیتلاعاتی ١٣٥٨ بڵاو كرایه‌وه‌ زیاتر له‌ ٥٠٠ كه‌س له‌و هێزانه‌ كوژران، به‌ڵام شاهیدانی عه‌ینی و به‌شدارانی ئه‌و شه‌ره‌ باس له‌ ٧٠٠ كه‌س كوژراو بریندار و تێكشكاندنی زیاتر له‌ ٨٠ ده‌زگا ماشینی ئه‌و هێزانه‌ ده‌كه‌ن. كه‌ له‌ دوایی دا و به‌ دامه‌زرانی سازمانی خه‌بات ئه‌و قاره‌مانه‌تیه‌ی هێزی پێشمه‌رگه‌ له‌ ده‌ی خه‌زه‌ڵوه‌ریان به‌ رۆژی پێشمه‌رگه‌ ناوزه‌د كرد.

به‌شی هه‌ره‌ زۆری ئه‌و كه‌سانه‌ی له‌ ده‌فته‌ری مامۆستا شێخ عزه‌دیندا چالاكیان ده‌كرد، له‌ ساڵی ١٣٥٩دا سازمانی خه‌باتیان پێك هێنا بۆیه‌ ناكرێ كه‌ باس له‌ مێژووی سازمانی خه‌بات ده‌كرێ، ئیشاره‌ به‌ كار و چالاكیه‌كانی رابردونه‌كرێ و پێم وایه‌ ئه‌وه‌ به‌شێكی گرینگی مێژووی سازمانی خه‌بات و پێكهێنه‌رانی سازمانه‌.

به‌ راگه‌یاندنی سازمانی خه‌باتیش وه‌ك ته‌شكیلاتێكی نوێ و به‌به‌رنامه‌، هه‌روه‌ها به‌ دانانی بنكه‌ و باره‌گا له‌ ناوچه‌ جیاجیاكانی كوردستان، له‌لایه‌ن هێزه‌ كوردستانیه‌كانی دیكه‌ كه‌ هۆكه‌ی جۆرێك خۆبینی و ته‌كره‌وی بوو تووشی كێشه‌ و شه‌رِ و هێرشی ته‌بلیغی ژه‌هراوی بوویه‌وه‌ و بۆ ماوه‌یێكی زۆر به‌ بیانووی جۆراوجۆر كۆسب و ته‌گه‌ره‌ی ده‌خرایه‌ به‌رده‌م، هه‌ر بۆیه‌ ئه‌م هه‌ڵسووكه‌وته‌ نابه‌جێه‌ی ئه‌و هێزانه‌ له‌لایێك و هێرشه‌ سه‌ربازیه‌كانی رژیم بۆ سه‌ر كوردستان له‌لایێكی دیكه‌، بوونه‌ فشارێكی قورس بۆ سه‌ر سازمانی خه‌بات به‌ جۆرێك كه‌ ده‌بوو ئه‌و هێز و پوتانسیه‌له‌ی كه‌ هه‌یه‌تی له‌لایێك بۆ به‌رنگاری له‌گه‌ڵ رژیم و دیفاع له‌ كوردستان و له‌لایێك بۆ دیفاع له‌ بوونی خۆی و مانه‌وه‌ی به‌ كار بێنێ، هه‌ر ئه‌وه‌ بووه‌ هۆی ئه‌وه‌ی كه‌ سازمانی خه‌بات نه‌توانێ بۆ هه‌موو ناوچه‌كانی كوردستان وه‌ك پێویست په‌ل بكێشێ. له‌ ده‌یه‌ی شه‌ست دا له‌گه‌ڵ چرِ و به‌ربڵاو بوونه‌وه‌ی هێرشی هێزه‌كانی رژیم بۆ سه‌ر كوردستان سازمانی خه‌بات وه‌ك هێزێكی به‌توانا له‌ مه‌یدان و بوونی هێزێكی پێشمه‌رگه‌ی به‌باوه‌رِ و قاره‌مان، توانی له‌ زۆربه‌ی ناوچه‌كانی كوردستان هه‌ر له‌ ناوچه‌ی مه‌هاباد، بۆكان، سه‌رده‌شت، بانه‌، سه‌قز و مه‌ریوان چالاكی به‌رچاوی هه‌بێ و به‌رنگاری هێزه‌ داگیركه‌ره‌كان بێته‌وه‌ و زه‌به‌ی كاریگه‌ریان لێ بوه‌شێنێ. به‌داخه‌وه‌ له‌ ناوه‌راستی ده‌یه‌ی ٦٠ دا رێزه‌كانی سازمان خه‌بات تووشی لێكترازان و ئینشعاب بووه‌وه‌ و ئه‌و رووداوه‌ سازمانی خه‌باتی تووشی كێشه‌ی ناوخۆیی كرد، هه‌ر بۆیه‌ سازمانی خه‌بات بۆ چه‌ندین ساڵ ئاساری ئه‌و جیابوونه‌وه‌ی به‌ سه‌ره‌وه‌ ما و كاردانه‌وه‌ی هه‌بوو له‌ سه‌ر كار و چالاكیه‌كانی. به‌ سه‌ر ئه‌وه‌شدا سازمانی خه‌بات به‌رده‌وام بوو له‌ چالاكیه‌ نیزامی و ته‌شكیلاتی و ته‌بلیغیه‌كانی دژ به‌ رژیمی داگیركه‌ری ئێران و رێكخستنه‌وه‌ی ئه‌ندام و به‌شه‌كانی.

به‌ سه‌رهه‌ڵدانى جه‌ماوه‌رى و روودانى ئینتفازه‌ له‌ كوردستانى عێراق، مامۆستا شێخ جه‌لالی حوسه‌ینی وه‌ك سكرتێری گشتی سازمانی خه‌بات له‌ رێگه‌ی رادیۆ ده‌نگی خه‌باتی كوردستان و به‌شداری له‌ كۆرِ و كۆبوونه‌وه‌ی خه‌ڵكی رانیه‌ كرد و هانی خه‌ڵكی دا دژ به‌ رژیمی به‌عس به‌رده‌وام بن و راپه‌رین به‌ ئه‌نجام بگه‌یێنن. ئه‌م هه‌نگاوه‌ی سازمانی خه‌بات له‌و هه‌ل و مه‌رجه‌دا شانازیێكی گه‌وره‌یه‌ و لاپه‌رِه‌یێكی زێرِینه‌ له‌ مێژوویدا ده‌دره‌وشێته‌وه‌.

له‌ دوای سه‌ركه‌وتنی ئینتفازه‌ رژیمی ئێران ده‌ستی ئاواڵه‌ بوو له‌ باشووری كوردستان و ده‌ستی كرد به‌ ترۆر و رِه‌شه‌ كوژی چالاكانی سیاسی كورد و سازمانی خه‌باتیش وه‌ك باقی هێزه‌كانی كوردستانی ئێران ژماره‌یێكی به‌رچاو له‌ ئه‌ندامانی به‌ ده‌ستی تیمه‌كانی ترۆر شه‌هید كران، هاوكات له‌گه‌ڵ فشاره‌ سیاسیه‌كان، چالاكی نیزامی كه‌م ره‌نگ بوویه‌وه‌ و به‌شێوه‌یێكی كاتی و له‌ به‌ر مه‌سڵه‌حه‌تی هه‌رێمی كوردستانی عێراق راگیرا.

دووهه‌م: هه‌رێمی كوردستان بووه‌ مه‌یدانی رمپازێنی هێزه‌ ئیتلاعاتی و ترۆریسته‌كانی رژیمی ئێران و فشارێكی زۆر خرایه‌ سه‌ر هێزه‌ كوردیه‌كانی ئێران كه‌ له‌وێ جێگیر بوون، سازمانی خه‌بات له‌و ماوه‌دا تووشی ده‌یان قه‌یرانی جۆراوجۆری وه‌ك نه‌داری و هه‌ژاری و كۆچ و كۆچبار بۆوه‌. كه‌ ئه‌وه‌ كاردانه‌وه‌ی هه‌بوو له‌ سه‌ر چالاكی و هه‌ڵسوورِانی سازمان به‌ جۆرێك ئه‌ندام و پێشمه‌رگه‌كانی سازمان بۆ ماوه‌ی چه‌ند ساڵ به‌ مه‌ترسیه‌كی زۆر و له‌و په‌رِی نه‌داری دا كار و باره‌كانی خۆیان راده‌په‌رِاند.

له‌ كۆتایی ده‌یه‌ی ٧٠ی هه‌تاوی دا، فشاره‌كانی رژیم بۆ سه‌ر سازمانی خه‌بات به‌ ئه‌ندازه‌یێك زیادی كرد كه‌ به‌ ناچار بنكه‌ و باره‌گاكانی له‌ ناوچه‌ی سلێمانی به‌ره‌و هه‌ولێر گواسته‌وه‌. له‌ دوای جێگیر بوونی له‌ هه‌ولێر سازمان ده‌ستی كرد به‌ خۆ رێخستنه‌وه‌ی نێوخۆیی و سازماندانه‌وه‌ی هه‌موو به‌شه‌كانی كه‌ له‌ ئاكامدا توانی له‌ ساڵی ١٣٨٤ كۆنگره‌ی سێهه‌می خۆی له‌ كه‌شێكی ئارامدا ببه‌ستێ.

سێهه‌م: به‌ پرۆڤه‌ كردنی وه‌زعی ناوچه‌ و جیهان و ئێران و كوردستان و ئه‌و ئاڵووگۆرانه‌ی له‌ دوای رووخانی رژیمی دیكتاتۆری به‌عس هاتنه‌ ئاراوه‌، سازمانی خه‌بات توانی له‌ دوای ١٧ ساڵ به‌ سه‌ر كۆنگره‌ی دووهه‌میدا، كۆنگره‌ی سێهه‌می خۆی ببه‌ستێ. ئه‌و كۆنگره‌ سه‌ره‌تا و نوقته‌ گۆرانێك بوو له‌ سازمانی خه‌باتدا، به‌ له‌ به‌رچاوگرتنی كاڵ بوونه‌وه‌ی مه‌سه‌له‌ ئایدۆلۆژیه‌كان و به‌رزبوونه‌وه‌ی هه‌ستی نه‌ته‌وه‌یی له‌ نێو خه‌ڵك و هێزه‌ كوردستانیه‌كان، سازمانی خه‌باتیش توانی ئاڵووگۆرِ له‌ به‌رنامه‌ و ئامانجه‌كانی دا پێك بێنێ وهه‌روه‌ها نوێ كردنه‌وه‌ له‌ ئورگان و به‌شكانی دا بكات و به‌ رۆحێكی نوێوه‌ بۆ پێشه‌وه‌ هه‌نگاو بنێ. له‌ ماوه‌ی ئه‌و چوارساڵه‌دا توانی له‌ رێگه‌ی ئه‌ندامانی ئوروپاوه‌ چه‌ندین كۆمیته‌ی رێكخستن سازكا و كاری سیاسی و ته‌شكیلاتی له‌ ئوروپا و قاره‌ی ئه‌مریكا ده‌ست پێ بكات. 

له‌ ساڵی ١٣٨٨ی هه‌تاویدا كۆنگره‌ی چواره‌م به‌سترا، له‌م كۆنگره‌دا دووباره‌ له‌ سه‌ر به‌رنامه‌كانی كۆنگره‌ی سێهه‌م پێداگری كرایه‌وه‌ و توانی چه‌ند ئاڵووگۆرِێك له‌ قه‌باره‌ی سازمانی خه‌باتدا دروست بكات، هه‌روه‌ها مه‌سه‌له‌ی دامه‌زرانی رێكخرا و ناوه‌ندی جیاجیا به‌ ئامانجی خزمه‌ت به‌ تێكرِای چین و توێژه‌كانی كۆمه‌ڵگای كوردستان، خرا به‌ر باس و به‌رنامه‌ی كاریه‌وه‌.

له‌ سه‌ر رێنمایه‌كانی كۆنگره‌ی چواردا توانرا ناوه‌ندێكی سینفی سیاسی بۆ توێژی لاوان له‌ ساڵی ١٣٩٠دا پێك بێت، ئه‌و ناوه‌نده‌ ئێستا خاوه‌ن لۆگۆ و به‌رنامه‌ و ماڵپه‌رِی تایبه‌ت به‌ خۆیه‌تی و به‌ جیددی له‌ هه‌وڵی ئه‌وه‌دایه‌ كه‌ به‌ هاكاری كۆمیته‌كانی ده‌ره‌وه‌ی سازمان، له‌ وه‌ڵاتانی ئوروپایی و له‌ هه‌ر شوێنێكی دیكه‌ كه‌ بۆی بلوێ كۆمیته‌ی رێكخستنی خۆی دامه‌زرێنێ. هه‌روه‌ها سه‌باره‌ت به‌ خوێندكاران، كۆمیته‌ی خوێندكاران پێكهاتووه‌و ئه‌و كۆمیته‌له‌ خۆ ئاماده‌ كردندایه‌ بۆ به‌ستنی كونفرانسی یه‌كه‌م و دیاری كردنی به‌رنامه‌ و كاری داهاتووی خۆی.

كۆمیته‌ی ئافره‌تانی سازمانی خه‌بات كه‌ له‌ ٧ی خه‌رمانانی ١٣٨١دا دامه‌زراوه‌، به‌ پشتیوانی سه‌ركردایه‌تی سازمان خه‌ریكی ئاماده‌كاری و به‌ستنی كونفرانسی خۆیانن و به‌ ته‌مان له‌ داهاتوویێكی نزیكدا و پێش به‌ستنی كۆنگره‌ی پێنجی سازمانی خه‌بات كاره‌كانیان ته‌واو بكه‌ن و پێداچوونه‌وه‌یێك به‌ شێوه‌ی كار و به‌رنامه‌كانی خۆیاندا بێنن.

سازمانی خه‌بات له‌ پێناو نزیكی هه‌موو لایه‌نه‌كانی بزوتنه‌وه‌ی ئازادیخوازی خه‌ڵكی كوردستان له‌ یه‌ك ساڵی رابردوودا پرۆژه‌یێكی ١٠ خاڵی خسته‌ به‌رده‌م لایه‌نه‌كان به‌و ئامانجه‌ی ئه‌و هێزانه‌ كۆتایی به‌و پرش و بڵاویه‌ بێنن و به‌و جۆره‌ لێك نزیك بوونه‌وه‌یێك بێته‌ ئاراوه‌ و هه‌روه‌ها زه‌مانه‌تێك بێت كه‌ هێزه‌ كوردستانیه‌كان خۆ به‌دوور بگرن له‌ شه‌رِ و كێشه‌ی نێوخۆیی و سه‌ره‌تایێك بێ بۆ نزیكی و ته‌بایی له‌ نێویاندا. هه‌روه‌ها له‌ په‌یوه‌ندیه‌ سیاسیه‌كانی دا توانیویه‌تی په‌یوه‌ندیێكی دۆستانه‌ی له‌گه‌ڵ هێز و لایه‌نه‌ سیاسیه‌كانی هه‌ر چوارپارچه‌ی كوردستان هه‌بێ و ئه‌و دۆستایه‌تیانه‌ به‌ رێزی به‌رانبه‌ره‌وه‌ راگرێ.

له‌ پێوه‌ند به‌ ئه‌حزابی ئێرانی جیاواز له‌ سازمانی موجاهیدین كه‌ په‌یوه‌ندی و دۆستایه‌تیێكی كۆنه‌ و ده‌گه‌رێته‌وه‌ بۆ ده‌یه‌ی ٧٠ی هه‌تاوی، توانیویه‌تی له‌گه‌ڵ ئه‌حزابی نه‌ته‌وه‌كانی ئێران، وه‌ك به‌لووچ و عه‌ره‌ب و نه‌ته‌وه‌ شۆرشگێرِه‌كانی دیكه‌ په‌یوه‌ندیێكی سالم رێك بخات.

له‌ دوای ئه‌و پۆلێنبه‌ندی و كورته‌ مێژووه‌ی سازمانی خه‌بات بۆمان روون ده‌بێته‌وه‌ كه‌ ئه‌و هێزه‌ به‌ پێی قۆناغ و هه‌ل و مه‌رجه‌كان به‌ هه‌ست كردن به‌ مه‌سئولیه‌ته‌وه‌ له‌ حاست نه‌ته‌وه‌ی كورد و بزوتنه‌وه‌ و داوا ره‌واكانی هه‌ڵسووكه‌وتی كردوه‌. 

ئه‌مساڵ یادی ٥ی خه‌رمانان له‌ هه‌ل و مه‌رجێكدا ده‌كه‌ینه‌وه‌ كه‌ جیاوازه‌ له‌ ساڵانی پێشوو، له‌ ناوچه‌ی خۆرهه‌ڵاتی ناوه‌راستدا به‌ چه‌ندین ده‌سه‌ڵاتی دیكتاتۆر له‌ ناوچوون و ئێستا وه‌ڵاتی سوریه‌ كه‌ هاوپه‌یمانێكی ستراتیژی رژیمی ئێرانه‌، به‌ره‌و رووخان ده‌چێ و تا ئێستا كونترۆڵی به‌شێكی زۆر له‌ خاكی سوریه‌ی له‌ ده‌ست داوه‌. به‌ رووخانی 

رژیمی سوریه‌، به‌و پێیه‌ی هه‌ل و مه‌رجی خه‌ڵكی ئێران به‌ هۆی به‌رنامه‌ و سیاسه‌ته‌كانی رژیمه‌وه‌ رۆژ له‌ دوای رۆژ دژوارتر و مه‌ترسیدار ده‌بێته‌وه‌. بێكاری، هه‌ژاری و گرانی به‌ ته‌واوی ته‌نگی به‌ خه‌ڵك هه‌ڵچنیوه‌، له‌ هه‌مانكاتدا رژیم تا دێ زیاتر پشت به‌ هێزی سه‌ركوت ده‌به‌ستێ و هه‌موو جۆره‌ ماف و ئازادیێكی خه‌ڵكی ئێران پێشێل ده‌كا، هه‌روه‌ها له‌ كوردستاندا له‌ هه‌موو ئامرازێك بۆ سه‌ركوت و بێ ده‌نگ كردنی خه‌ڵك كه‌ڵك وه‌رده‌گرێ و به‌ شێوه‌یێكی به‌رنامه‌ بۆدارێژراو دیارده‌ی موخه‌دیرات په‌ره‌ پێ ده‌دا و تا دێ كوردستان زیاتر میلیتاریزه‌ ده‌كرێ و بچووكترین جووڵه‌ و چالاكی به‌ توندترین شێوه‌ سه‌ركوت ده‌كا، ئه‌ونده‌ خۆی له‌ مه‌ترسیدا ده‌بینێ كه‌ رێگه‌ به‌ هیچ چالاكیێكی فه‌رهه‌نگی و كۆمه‌ڵایه‌تی ناداو هه‌ر نه‌وعه‌ كۆرِ و كۆبه‌ندێك به‌ سیاسی ده‌كرێ و به‌رخوردی له‌گه‌ڵ ده‌كا. سه‌رانی ئه‌و رژیمه‌ باش هه‌ستیان به‌وه‌ كردوه‌ كه‌ له‌ دوای كۆتایی هاتنی رژیمه‌كه‌ی ئه‌سه‌د نۆبه‌ی وانه‌، له‌وه‌  تێگه‌یشتوون كه‌ رقی جه‌ماوه‌ر كڵپه‌ بكات هیچ هێزێكی سه‌ركوت ناتوانێ به‌ری پێ بگرێ. هه‌روه‌ك چۆن له‌ سوریه‌ به‌ سه‌ر ئه‌و هه‌موو جینایه‌ت و كوشت و برِ و ماڵوێرانیه‌ی رژیمی به‌عس به‌ سه‌ر خه‌ڵكی ئه‌و وه‌ڵاته‌یدا هێناوه‌، له‌گه‌ڵ هه‌ر جینایه‌تێكدا خه‌ڵك رق ئه‌ستوورتر ده‌بن و بێ راوه‌ستان له‌ پێناو له‌ ناوبردنی به‌شار ئه‌سه‌د و ده‌سه‌ڵاته‌كه‌ی به‌ره‌و پێش ده‌چن.

گوومانی تێدا نیه‌ خه‌ڵكی ئێرانیش كێردیان به‌ ئێسك گه‌یشتووه‌ و به‌ یه‌ك جره‌قه‌ بێ راوه‌ستان تا كۆتایی ئه‌و ده‌سه‌ڵاته‌ ده‌رۆن. هه‌ر بۆیه‌ ده‌بێ ئێمه‌ی كورد ئاماده‌تر و به‌ ده‌رس وه‌رگرتن له‌ رابردوو له‌ پێناو مافه‌كانمان حه‌كیمانه‌ هه‌نگاو بنێین و كادر و پێشمه‌رگه‌و ئه‌ندامانی سازمانی خه‌باتی كوردستانی ئێران هه‌ر وه‌ك چۆن له‌ رابردوودا چاونه‌ترس و قاره‌مانانه‌ تێكۆشاون، ئێستاش كه‌ رژیمی ئێران له‌ رووخان و له‌ناوچوون زیاتر هیچ رێگه‌یێكی نه‌ماوه‌، بێ ده‌سته‌وه‌ستان و به‌ ووریاییه‌وه‌ له‌ پێناو ئامانجه‌ به‌رزه‌كانی سازمانه‌كه‌یان كه‌ رزگاری كورد و كوردستانه‌ هه‌نگاو بنێن.

ali


ڕێکه‌و 2012-08-31 03:00:26
به‌شی ( وتار )







سیاسی