پەیامی ڕێکخراوەکانی لاوان و ئافرەتانی خەباتی کوردستانی ئێران بە بۆنەی هاتنی نەورۆز و ساڵی نوێ

 

خەڵکی خۆڕاگری کوردستان !

ئافرەتان و لاوانی تێکۆشەر !

 

بە بۆنەی هاتنی جێژنی نەورۆز وەک سەرەتا ودەسپێکی یەکەم ڕۆژی ساڵی ۱۳۹۹ کۆچی خۆری بەرانبەر بە ساڵی ۲۷۲۰ کوردی ، پیرۆزبایی خۆمان وەک ڕێکخراوی ئافرەتانی خەبات و لاوانی خەبات بە کەس و کاری سەربەرزی شەهیدان و زیندانیانی سیاسی و هەموو خەڵکی کوردستان ڕادەگەیەنین.

هەروەها ئاواتە خوازین ساڵی نوێ، ساڵی وەدیهاتنی تێکرای مافەکانی گەلی کورد و گەلانی ئێران بێ و ببێتە کۆتا ساڵی دەسەڵاتداریەتی دەسەڵاتی دژە مرۆڤی ئاخوندی.

هەروەک ئاگادارن نەورۆزی ئەمساڵ بارودۆخێکی جیاوازی هەیە و گرنگترین هۆی ئەم جیاوازیە ، تەشەنە سەندنی ڤایرۆسی کۆڕۆنا لە زۆربەی وڵاتانی جیهان وقەرەنتینە کردنی خەڵک و داخستنی سنورەکان لە نیوان وڵاتەکان تەنانەت شارەکانیشە. وڵاتی ئێران لەم ئاڵۆگۆڕانەش بێ بەش نەبوە و تەنانەت بە پێی ئامارە نێونەتەوەییەکان ، ئێران پلەی سێهەمی توشبوان و گیان لەدەستدانی بەهۆی ئەم ڤایرۆسە، لە ئاستی جیهان دا هەیە. ئەم ئامارە دەرخەری ئەوەیە ئەم دەسەڵاتە نەک هێز و توانا بەڵکو خواستیشی نیە بۆ کونتڕوڵی قەیرانەکان و پاراستنی گیانی هاوڵایەتیانی ئێران ، بە تایبەت کوردستان.

 

دڵسۆزان و خەباتکارانی ڕێگەی ئازادی !

 

لە کاتێکدا ساڵی ۹٨ تێپەردەکەین کە لەم ساڵەدا خەڵکی ئێران بەگشتی و کوردستان بەتایبەتی لە دژی ئەو دەسەڵاتە و بۆ دەستەبەرکردنی مافە سەرەتاییەکانی خۆیان و بەدەست هێنانی پلەی شایانی مرۆڤایەتی خۆیان لە دژی ڕژیم ڕاپەرین. خۆپیشاندانی خەڵکی شۆڕشگێری ئێران و کوردستان لە ئێستادا بۆتە هێمای دەنگی ئازادیخوازی جەماوەری ئێران و کوردستان لە کۆمەڵگای نێونەتەوەییدا.

بەداخەوە بە هۆی جینایەت و سەرکوتە لە ڕادەبەدەرکانی ڕژیمی ملهۆڕی ئاخوندی، زیاتر لە ۱٥۰۰ لاوی تێکۆشەری ڕێگەی ئازادی لەم ساڵەدا و بەتایبەت لە مانگی خەزەڵوەر و سەرماوەز شەهید کراون و سەدان کەس لەبەندکران و دەیان کەس لە سێدارە دران . ڕژیمێک پڕاوپڕ لە هەستی ڕق و کینە لە بەرانبەر کۆمەڵگای نێونەتەوەیی و ناوچەکە، بەبیانویی تۆڵە سەندنەوەی کوشتنی قاسم سلێمانی سەرکردەی گروپی ترۆریستی سپای قودسی ڕژیم ، کە دەستی بە خوێنی هەزاران مرۆڤی بێتاوان سوور بوەو بە لێدانی دوو موشەک لە فڕۆکەی ئۆکراینی ، کە بوونە هۆی گیان لە دەست دانی ۱۷٦ کەسی نوخبە و بێتاوان، تا ئێستاش لە تاوانە یەک لە دوا یەکەکانی بەردەوامە.

 

هەروەها بە هۆی گەمارۆکان و زیاد بوونی ناوی ئێران بە ڕیزی ئێف ئای تی ئێف، دابەزینێکی بەرچاوی هەناردەکردنی نەوت و بەرهەمە پترۆشیمیەکانی ئێران کە یەکێک لە سەرەکیترین سەرچاوەی داهاتی ئەو ڕژیمە بۆ درێژە پێدان بە سیاسەتە هەڵەکانی و دابین کردنی باری ئابوری و چەک و تەقەمەنی گروپە ترۆریستیەکان وەک حیزبوڵا و حوسیەکانی یەمەن و حەشدی شەعبی لە عێراق بە مەبەستی ئاژاوگێڕی لە ناوچەکە و پەرەپێدانی شۆڕشی بەناو ئیسلامی بۆ دەرەوەی وڵات و بەتاڵان بردنی سەروەت و سامانی ئێران ، ئەمساڵ زیاتر لە ساڵانی ڕابردوو خەڵکی هەژار و کەم دەسەڵاتی ئێران و کوردستان چونەتە ژێر هێڵی هەژاری. ئاماری بێکاری زیاتر لە هەمووکاتێکە، کارگەو خاوەن کارگەکان توشی شکستی ئابوری بوون و جەماوەر و بەتایبەت لاوان بۆ بژێوی ژیانی خۆیان ڕۆژانە لەگەڵ هەزاران کێشە و گرفت ڕوبەڕوو دەبن .هەژاری و نەداری خەڵک بۆتە هۆی بەرزبوەنەوەی ئاماری دیاردەگەلێک وەک فرۆشی ئەندامانی جەستە لە سەراسەری ئێران و زیادکردنی دیاردەی کۆڵبەری لە سنورەکانی کوردستان. ساڵی ۹٨ بۆ خەڵکی کوردستان وێڕای هەموو ئەو ناخۆشی و کێشە و گرفتانە ساڵی کوشتنی ڕۆڵەکانی کورد لەسەر چیاکان، بەهۆی تەقەی ڕاستەوخۆی هێزە ئەمنیەکان و ڕەق هەڵاتنیان لەسەر شاخەکانی کوردستان بوو. ئەوەی لە سەرەتای دیکتاتوریەتی ڕژیمی ئاخوندی دیاربوو حاشاهەڵنەگرە ئەوەیە کە گیانی مرۆڤ لای ڕژیمی ئاخوندی نرخی نیە،و هەتا لە لایەن وڵاتانی زلهێزەوە فشاری لەسەر بێت و بکەوێتە پەلەقاژە زۆرتر ئازاری خەڵکی ستەم لێکراوی خۆی ئەدات.

 

لاوان و ئافرەتانی دڵسۆز !

تێکۆشەرانی ڕێگەی ئازادی !

 

بێگومان ڕژیمی دیکتاتۆری ئاخوندی لە کۆتاین ئەزمونی خۆی بە دۆڕان لە بەڕەنگاربونەوەی ڤایروسی کۆڤید ۱۹ ڕوبەرو بووەو. و ئەوەی وا لە پێناو تەندروستی خەڵک گیانی خۆیان فیداکردوە دوکتۆر، پەرەستار، کادری نەخۆشخانە و هەورەها لاوانی تێکۆشەرە، کە بە شێوەی خۆبەخش و بە پێک هێنانی هەڵمەت و کەمپەین لە شارو گوندەکانی کوردستان دژی ئەم ڤایرۆسە وەستاون و چاوەڕوانی ئەو دەسەڵاتە نگریسە نەبون. بێ دەربەستی و کەمتەرخەمی رژیمی دەسەڵاتداری ئێران بابەتێکی نوێ نیەو هەروەک هەمیشە ئەوە لاوانی بەهێز، ماندونەناس و نەبەزی ئێران و کورستانە کەگیانی خۆیان کردوەتە تەرخان بۆ پاککردنەوەی نیشتمانی خۆیان لە ڤایرۆسی کوڤید ۱۹ و دڵنیاین بە نەمانی ئەو دەسەڵاتە نەخۆشی و نەهامەتی لە کۆمەڵگەی پڕبایەخی ئێمەش لە ناو دەچێت.

 

ڕوونە کە ڕژیمی ئاخوندی جێگە و پێگەی خۆی و مەشروعیەتی لە کۆمەڵگای نێو نەتەوەیی زیاتر لە ڕابردوو لە دەست ئەدات، بە پێچەوانەوە بزوتنەوەی ڕزگاریخوازانەی گەلانی ئێران و بەتایبەت کوردستان، هەنگاوەکانی پتەوتر و سەقامگیرترە. لەساڵی ۹٨خەڵک بە پێی داواکاری هێزو لایەنەکانی چالاک لە دەرەوەی وڵات وەک ناوەندی ژنان و لیژنەی هاوئاهەنگی لاوان لە شانۆی هەڵبژاردنی مەجلیس بەشداریان نەکرد و بە تێکڕا بایکۆتیان کرد. کە دەنگدانەوەێیکی زۆری هەبوو لە میدیاکانی نێونەتەوەیدا. هەروەها سەرەڕای هەموو ئەو سەرکوت و جینایەتە ڕژانە سەرشەقامەکان و پێداگربوون لەسەر دەستەبەرکردنی مافەکانی خۆیان

و لە بۆنە جیاوازەکاندا هاوباوەڕی و تەبایی خۆیان لەگەڵ بزوتنەوەی مافخوازانەی کوردستان دەربڕیوە. شۆڕشی یەکانگیری خەڵکی شارەکانی کورستان، درووشمە پڕواتاکان و دیوارنوسیەکان و هاوخەمیان لەگەڵ بنەماڵەی شەهیدانی سەرشەقام و بەندکراوان ، بەڵگەی حاشاهەڵنەگری ئەو ڕاستیەیە. بێگومان ئەوەی لە ڕاپەرین و ناڕزایەتیەکانی ساڵی ۱۳۹۸ بەرچاو بوو بەشداری ئافرەتانی خەباتکار و چاونەترسی ئێران و کوردستان بوو. گیران و دەسبەسەر گرتنی لە ڕادەبەدەری ئافرەتانی نوسەر، ڕۆژنامەوان، ئافرەتانی پارێزەری مافی مرۆڤ و مافی ئافرەت لەم ساڵەدا دەرخەری ڕۆڵی گرنگیان بوو. سەرەڕای هەموو ئەم گیروبەندانە ئافرەتانی شۆڕشگێر، کە خاوەن وزە و ورەێیکی بێ وێنە بوون چە لەناو بەندیخانەکان و چە لە دەرەوە درێژەیان بە تێکۆشان لە پێناو دەستەبەرکردنی مافەڕەواکانی خۆیان داوە.

 

وێڕای پیرۆزبایی دوبارە بەم بۆنە پیرۆزەوە هیوادارین لە ساڵی نوێ دا شاهیدی ڕوخان و نەمانی ڕژیمی خوێنڕێژی ئاخوندی ببین و لێرەوە وەک ڕێکخراوەکانی ئافرەتان و لاوانی خە بات بەڵێن ئەدەین ، پێداگرتر بین لە خەبات تاگەیشتن بە لوتکەی ئازادی و ڕزگاری خەڵکی خۆڕاگری کوردستان و ئێران لە ژێر پەنجەی ڕژیمی دیکتاتۆری ئاخوندی.

 

ڕێکخراوەکانی ئافرەتان و لاوانی خەبات ی کوردستانی ئێران.

نەورۆزی ۱۳۹۹ کۆچی خۆری
ڕێکه‌و 2020-03-19 09:17:09
به‌شی ( کۆمه‌ڵایه‌تی )







سیاسی