پەیامی رێکخراوی لاوانی خەبات بەبۆنەی رۆژی جیهانی لاوان

لاوانی تێكۆشەری کوردستان!
لاوانی خۆڕاگر لە ریزەکانی رێکخراوی لاوانی خەبات!

بەبۆنەی رۆژی جیهانی لاوان گەرمترین پیرۆزبایتان پێشكەش دەكەین، هیوادارین کە ئەم یادە ببێتە مایەی خۆشی و ئاشتی بۆ لاوان بە گشتی و لاوانی کوردو لاوانی ئێران بەتایبەتی و ئەم رۆژە ببێتە هەوێنی گەیشتنی لاوان بە گشت مافەکانیان و وەدیهاتنی ئامانج و ئاواتەکانیان.

ساڵی ۱۹۹۹ نەتەوە یەکگرتووەکان ۱۲ی ئاگوستی بە رۆژی جیهانی لاوان ناساند، هەر لە دوای ئەو بڕیاڕەی نەتەوەیەكگرتوەكان هەموو ساڵێک و لە هەمان رۆژدا لە سەرانسەری جیھاندا یادی ئەو ڕۆژە بەرز رادەگیرێ.
جێگەی باسە کە دیاریکردنی رۆژێک بۆ لاوانی جیهان هەنگاوێکی ئەرێنی و گرینکە، بەڵام پێویستە ئەو بزانین کە بەتەنیا ناساندنی رۆژێک و یادکردنەوەی ئەو ڕۆژە، وەڵامدەرەوەی تێكرای خواست و داواکارییەکانی لاوان نیە و پێویستە جیاواز لە یاد كردنەوەی ئەو ڕۆژە، بەردەوام گرینگی بە ویست و داوای لاوان و پێشخستن و پەرەپێدانی تواناکانیان بدرێ و پاڵپشتی بەردەوام بکرێن.
بەداخەوە لە کوردستان و ئێرانی ژێر دەسەڵاتی رژێمی ئاخوندی، بە بەردەوامی هەوڵی لاوازکردن و دوورخستنەوەی لاوان لە مەیدانی کارکردن و چالاکی دراوەو بە مەبەست و تۆمەتی هەڵبەستراو پیلانەكانیان بۆ مل كەچ كردن و بێدەنگ كردنی لاوان و سەرکوتکردنیان خستۆتە گەر.
رژێمی ئاخوندی كە بە باشی هەست بە توانا و چاونەترسی لاوانی کورد دەكا، ترسی لە ئیرادەیان هەیەو دەزانێ کە بە پێشڕەوی و ڕاپەڕینی لاوانی کورد و لاوانی ئێران پایە لەرزۆکەکانی دەسەڵاتەکەیان خۆ ناگرێت و بەرەو روخان و لە ناچوون دەچێت، هەربۆیە هەوڵ دەدا، لە ڕێگەی بڵاوکردنەوەی مەوادی موخەدیر، دروستکردنی کێشەی کۆمەڵایەتی، زیندان، ئەشکەنجە، سێدارە و چەندین شێوازی دیكە هەوڵ بۆ كەم توانا كردن و لەناوبردنی لاوان دەدات.
سەرەرای فشارە بەدەوامەكانی رژێم، بە خۆشیەوە لاوانی خوێن گەرم و چاونەترسی کورد سڵ لە دوژمن ناكەن و هەمیشە ئامادەی رووبەڕنەوەی ئەو دەسەڵاتە دیكتاتۆرە بوون و پەیوەست بوونی بەردەوامی لاوانی خەباتگێر بە ریزی پڕشانازی سازمانی خەبات و رێکخراوی لاوان نموونەی ئەو خۆڕاگری و شۆرشگێریە پیشان دەدات.
بە تایبەت لاوانی ریزەکانی سازمانی خەبات و رێکخراوی لاوان هەمیشە ئامادەی قوربانیدانن لە پێناو بەدەستھێنانی مافەکانیان و گەیاندنی دەنگی دڵێریان بە هەموو دنیا و سەرخستنی خەباتی رەوای گەلەکەمان و پێویستە لاوان لە ریزی رێکخراوەکەمان لە هەوڵی زیاتری خۆ تەیارکردن و پێگەیاندن بن بە خوێندن و خوێندنەوە و فێربوون لە کەسانی خاوەن تەجرووبە و تێگەیشتووی نێو ریزەکانی سازمانی خەبات و رێکخراوەکەمان و وانەی شۆرشگێری و چاونەترسیان لێ وەرگرن.

بەم بۆنەوە جارێكی دیكە رێکخراوی لاوانی خەبات پیرۆزبایی بە لاوانی تێكۆشەر ڕادەگەێنێ‌ و هیواخوازە کە لاوانی خۆشەویستی کورد بە زوویی لە کوردستانی و ئێرانی ئازادا بە ماف و ئامانجەکانی خۆیان بگەن.

بڕوخێ‌ رژێمی ئاخوندی
سەركەوێ‌ خەباتی شێلگیرانەو تێکۆشانی جەماوەرو لاوانی ئازادیخواز.

رێکخراوی لاوانی خەبات
دەستەی بەڕێوەبەری
۱۲ ئاگۆستی ۲۰۱۹
ڕێکه‌و 2019-08-13 02:16:38
به‌شی ( به‌یاننامه‌کان )







سیاسی