29 ساڵ بەسەر كیمیابارانكردنی شاری سەردەشت تێدەپەرێت

29 ساڵ بەسەر كیمیابارانكردنی شاری سەردەشت تێدەپەرێت ئەو شارەی رۆژی 7ی پووشپەری 1366 لەلایەن رژێمی بەعسی لە ناوچووی عراق كیمیابارانكرا و لە ئەنجامدا زەرەر و زیانی گیانی ومالی زۆری لێكەوتەوە بەپێی ئامارەكان بە سەدان كەس شەهیدبوون و هەزارانی دیكە برینداربوون كە تائێستاش بریندارانی ئەو هێرشە چارەسەر نەكراون و بەدەست ئازار و ئێشی برینەكانیانەوە دەنالێنن و دەمرن . ئەم هێرش و كیمیابارانكردنەی شاری سەردەشت لە ئەنجامی شەری نێوان رژێمی بەعسی لە ناوچووی عێراق و رژێمی ئاخوندی ئێران هاتەئاراوە ئەو شەرەی جگە لە ماڵ وێرانی و كوژران و برینداربوونی زیاتر لە یەك ملیۆن كەس لە هەردوولا قازانجێكی دیكەی نەبوو هەرچەند بەكارهێنانی چەكی كیمیاوی بە پێی بریار و رێكەوتنە نێودەوڵەتیەكان قەدەغەكراوبوو بەلام بەداخەوە ولاتانی جیهان لەو كاتەدا لە ئاست ئەو رووداو و تاوانە گەورەیە بێدەنگ بوون و هەڵوستێكی روون و ئاشكرایان نەبوو.
ئەوەی جێگەی سەرنجە دوای تێپەربوونی 29 ساڵ بەسەر ئەو كارەساتە تا ئێستا رژێمی ئاخوندی هەوڵی چارەسەركردن و قەرەبووكردنەوەی قوربانیان و بریندارانی نەداوە وەك چۆن لە سەرجەم بوارەكانی دیكە كەمتەرخەمی زۆریی نواندووە بە هەمان شێوەش لە هەمبەر قەرەبووكردنەوەی زیان لێكەوتوان و بریندارانی ئەو كارەساتە كەمتەرخەمی زۆری نواندووە و تەنها كارێك كە لەو بۆنەیەدا دەیكەن بریتیە لە بەلێنی درۆ و جێبەجێنەكردنی داواكاریەكانی خەلكی ئەگەر چی وەبیرهێنانەوەی ئەم كارەساتە دەبێتە هۆیی نوێبوونەوەی برین و ئازارەكان بەلام لەگەل ئەوەشدا پێویستە ئەم یادكردنەوانە لە بیر و زهنی هەموو تاكێكی كورد بمێنێت و نەوەی داهاتوو بە ئازار و ناخۆشیەكانی رابردووی نەتەوەكەمان ئاشنا بكەین .


 
ڕێکه‌و 2016-07-01 12:14:10
به‌شی ( وتاره‌کان )







سیاسی