35 خەباتى بێ ووچان لە پێناو گەل و نیشتمان صورةسازمانی خەباتی كوردستان ئەم ساڵ پێدەنێتە 36ساڵەی تەمەنی كار و تێكۆشانی خۆی لە پێناو رزگاری نەتەوەی كورد لەدەست رژێمی دیكتاتۆری ئاخوندی ئێران. ئەو رژێمەی كە تائێستاشی لەگەڵدابێت بەرداوامە لە سەر سیاسەتی حاشا لە مافی گەلانی ئێران بەگشتی و كورد بەتایبەتی ، سازمانی خەبات لەماوەی ئەو 35 ساڵەدا یەكێك بووە لەو رێكخراوانەی كە تائێستا سەری بۆ ویست و داواكارییەكانی دوژمنی كورد دانەنواندووە و شێلگیرانە هەوڵی رزگاری و سەرخستی خەباتی ڕەوای گەلەكەمانی داوە و لەو پێناوەشدا دەیان قارەمانێتی و داستانی خوڵقاندووە كە بوونەتە جێگەی شانازی بۆ گەلەكەمان. سازمانی خەبات لە هەل و مەرجێكی ناسك و هەستیار دا بوونی خۆی وەك هێزێكی تێكۆشەری كورد لە كوردستانی ئێران راگەیاند. لەبەرانبەر رژیمێكدا تاوی دایە خەبات و تێكۆشان كە بچووكترین بروای بە مافی گەلانی ئێران نەبوو و هەر لەسەرەتای هاتنە سەركاری بە بیانووی جۆراوجۆر كەوتە زیندانی كردن و شكەنجەدان و شەهیدكردنی ئەو كەسانەی كە داوای مافی خۆیان و نەتەوەكانیان دەكرد، بەتایبەتی كورد كە یەكێكە لەو نەتەوانەی زۆرترین پێشێلكاری و ستەمی لەبەرانبەر داكراوە. رژێم كە گەلی كوردی وەك وەك گەلێكی دیموكرات و حەقخواز و وریا و ئاشنا بە مافەكانی بە گەورەرترین دژمنی خۆی دەبینی، لە ژێر ناوی جیاخواز و كافر هەموو هەولێكی بۆ كپ كردنی دەنگی مافخوازانەی بە كار هێنا.  رژێمی ئاخوندی لە ماوەی 36 سالی رابردوو نەك نەیتوانی و نەیویست خزمەتی خەڵكی ئێران بكات بەڵكو تەنانەت خەیانەتی لە كەسە نیزیكەكانی خۆیشی كرد و ئەوانەی لە خەیاڵی بووژانەوە و شۆڕشی ئیسلامی دەستیان لە هیچ جینایەتێك بۆ مانەوەی ئەو دەسەڵات نەپاراست ئەمرۆ هەست بە پەشیمانی و شكست دەكەن. ئێرانی ئەمرۆ ولاتێكی دیكتاتۆر لێدراوە كە دانیشتووانی زیاتر لە هەر كاتێكی تر هەست بەو راستیە دەكەن، كە ئەم حكومەتە پێویستی بە گۆرانێكی بنچینەیی و ئێران پێویستی بە شۆڕشێكی سیاسی و فەرهەنگی یە و خۆپیشاندان و نارەزایەتیە بەرەوامەكان لە دژی رژێمی ئاخوندی بەشێكیان دەنگدانەوەی جیهانی بە دوای خۆیدا هێناوە زەنگی ئاگاداركردنەوەی دەسەڵاتدتارانی ئاخوندییە.
گەلی كورد هەر زوو ناوەرۆكی راستەقینەی ئاخوندانی بۆ دەركەوت و خەبات و تێكۆشان لە دژی ئاخوندانی مێشك ووشك و جینایەتكاری دەست پێكرد. یەكێك لەو رێكخراوانەی كە لەپێناو ئەو ئامانجەدا دامەزرا سازمانی خەباتی كوردستان بوو كە لەسەرەتاوە بە ناو و ئارم و بەرنامەیەكی جیاوازتر لە حیزب و رێكخراوەكانی تری كوردستانی ئێران لە 5ی خەرمانانی 1359 بە رامبەر بە 27 ئاگۆستی 19980 بە دەست پێشخەری كۆمەلێك مامۆستا لە پێش هەمووشیانەوە مامۆستا سید جەلال حوسێنی هاتە ناو مەیدانی خەبات و تێكۆشانی دژبە رژێمی ئاخوندی ئێران و بەشێوەیەكی بەرچاو لەلایەن نیشتیمان پەروەرانەوە پێشوازی لێكر.
دامەزراندنی سازمانی خەبات دەرفەتێكی نوێ بوو بۆ زۆرێك لە خەلكی كوردستان كە دەیانویست لە پێناو ئامانجە بەرزەكانی نەتەوەكەمان خەبات بكەن و لەسەر ئەو بیر و باوەرەی كە هەیانە خزمەتی گەل بكەن. لەماوەی ئەو ساڵیانەی سازمانی خەبات لە تێكۆشاندا بووە زۆر سادقانە و راستگۆیانە بۆ گەیشتنی گەلەكەمان بە مافەكانی لە هەوڵدابووە و خاوەنی دەسان داستانی قارەمانەتی و حەماسەی نەبەردی پێشمەرگانەیە و هەروەرها خاوەنی كاروانێكی دوردرێژی سەروەرانی گەل ، شەهیدانی سوورخەڵاتی كوردستانە كە لە ریزەكانی سازمانی خەبات گیانی پاكیان پێش كەش بە كوردستان كردووە. یەكێك لەو هەوڵانەی كە لەلایەن سازمانەوە درا بۆ پێشخستنی خەباتەكەی و گەیاندنی دەنگی گەلەكەمان ئەوەبوو كە پاش چەند سالێك لە دامەزراندنی توانی هەم رۆژنامەیەك بە ناوی تێكۆشان دەربكات وهەمیش رادیۆیەك بە ناوی رادیۆ دەنگی خەباتی كوردستانی ئێران دابمەزرێنن كە دەورونەخشێكی بەرچاویان بینی لە گواستنەوەی هەواڵ و چالاكی پێشمەرگە و هەروەها دەرفەتێك بۆ ئەوەی كە لە رێگەی ئەم دەزگایانەوە پەرە بە بواری رۆشنبیركردن و ئاشنا كردنی خەلكی بە ماف و ئەركەكانیان و هەروەها دەرخستنی تاوانەكانی رژێم بدرێت.
ئەوەی جێگەی دڵخۆشیە لەگەڵ هەموو سەختی و هەوراز و نشێوەكانی مەودای خەباتی ، بە بەردەوامی ریساڵەتی مێژوویی خۆی وەك هێزێكی تێكۆشەری نەتەوەیی و نیشتمانی بەرەو پێش دەبات سەربەرزانە لە مەیدانی خەبات و تێكۆشان و خزمەت بە گەل و نیشتیمان ماوەتەوە و رۆژ بەرۆژیش زیاتر بەرەو پێشتر دەچێت .
سازمانی خەبات لە پێناو دامەزراندنی حكوومەتێكی دیموكراتیك و پارلەمانی كە مافی هەموو پێكهاتەكانی كوردستانی تێدا دەستبەر بكرێ‌ تێدەكۆشێ و بۆ وەدی هێنانی ئەو خەونەش لەهیچ گیانبازییەك دریغی ناكات و هەروەها ئامادە نییە بچووكترین لادان و هەڵخلیسكان بكات لە سەر بنەما راستەقینە و ئوسوولیەكانی كە هەر لەسەرەتای دامەزراندنیەوە پێی دەناسرێتەوە. بێگومان ئاسۆی گەلەكەمان بە بوونی هێز و لایەنی تێكۆشەری وەك سازمانی خەبات روونە و دواجار سەركەوتن بۆ خەڵكی كوردستان و روورەشی و رووخان بۆ دەسەڵاتدارانی ملهوری ئاخوندییە.
ڕێکه‌و 2015-09-09 08:30:28
به‌شی ( وتاره‌کان )







سیاسی